عبد الله الزهدي أفندي

İbnü’l-Emin Mahmud Kemal İnal, Son Hattatlar

Evkaf Nâzırı Hasib Paşa Konağı’nın arsasına inşâ edilmiş olan Katırcıoğlu Hanı’nın arka tarafında ikâmet eylediği eve bir me’mur gelerek Topkapu Sarayı’na davet etdi. Saraya gitdiğinde Sultan Abdülmecid’in huzuruna kabûl olundu. Hattat olan pâdîşâh, Bâb-ı Âlî’den takdim edilen nümûneleri karşısına dizdirüb temâşâ etdiği sırada içlerinden Zühdî Efendi’nin yazısını alub “Oğlum bunu sen mi yazdın?” diye sordu. O da “Kulunuz yazdım.” dedi. Bunun üzerine Pâdîşâh da, “Allah feyzini müzdâd etsin. Sana kayd-ı hayat ile 7500 guruş me’aş tahsis ile Harem-i Şerîf’in yazılarını yazmağa me’mur etdim.” dedi.

-

Sadrâzâm Âlî Paşa tarafından yazılan tahrirâtın sûretidir.

Harem-i melâ’ik hademi hazret-i risâlet-penâhînin mevâkı-i ma’lûme ve mübarekesine hazîne-i hazreti Nebevî Rûznâmçecisi sâbık İbrahim Efendi’nin yazmış olduğu yazıların tahkîk olunduğuna göre pek çok mahâlle yazılmayub sekiz aded kubbe-i âliyye kenarlarına ve âdi sıva üzerine tahrir olunmuş olduğundan bunun mahvı ile bu def’a ba irâde-i senîyye-i hazret-i şâhâne me’mur ve ta’yin kılınmış olan meşâhir-i hattatînden Zühdî Efendi ma’rifeti ile tahrir etdirilmesi ve mümâ-ileyhin tahrir edeceği yazıların ol tarafda çıkan bir nevi’ somaki taşdan vaz’ile mezkûr yazıların öyle sıva üzerine olmıyarak işbu taşların üzerine tersim ve hâk’ olunması hususuna emr ü irâde-i senîyye-i hazret-i pâdîşâh-ı müte’allik ve şeref-südûr buyrulmuş ve efendi-i mümâ-ileyh dahi bu kerre ol tarafa azîmet edüb sûret-i hâl şeyhü’l-harem-i hazret-i Nebevî devletlû paşa ve ebniyye-i âliyye me’muru se’adetlû efendi hazerâtına dahi beyân ve işâr kılınmış olub beyândan müstâğni olduğu üzere hâdimü’l-haremeyni’ş-şerîfeyn olan veliyy-i nimet-i bî-menendîmiz pâdîşâhımız efendimiz hazretlerinin işbu ebniyye-i mübârekenin her vech ile hüsn-i tanzîmi içün lâzım gelen mesârifin tesviyesine kat’an diriğ-i himmet buyurmıyacakları bî-iştibâh olduğu gibi ferâzâ mezkûr yazılar içün biraz ziyâde masraf vuku’ bulsa bile kemâl-i mefhâret ve memnuniyyetle ‘itâsı makrûn-ı müse’ade-i senîyyeleri olmakla bunun içün ebniyye iskelesi gibi şey lâzım gelmeyüb tekerlekli bir iskele tanzîmi ile matlûb hâsıl olacağı ve bu ise mesârifi hazîne ile vücûde geleceği bedi’hîyâtdan bulunmakla ber mucib-i irâde-i seniyye iktizâsının icrâsı hususuna himmet etmeniz siyâkında şukka tahrir ve tesyir kılındı.

25 Cumâde’l-âhire 1274.

es-Seyyid Mehmed Emîn Âlî