Kâtibzâde Mustafa Efendi

Ketebe.org İsmail Orman

Müderrisînden, zarif, nüktedân, halûk, ehl-i irfân bir vücûd-i âli-cenâb bir zât olduğu nakledilen Kâtibzâde Mustafa Efendi’nin, Türk ve İslam Eserleri Müzesi’nde, Mustafa Âşir Efendi Kütüphânesi’nden intikal eden tarihsiz ve H. 1160/M. 1747 tarihli meşk murakka’ları vardır.(D. 2482, D. 2495).   

Müstakimzâde Süleyman Sâdeddin, Tuhfe-i Hattatin

Pederi tersâne-i âmire kâtiblerinden olmakla kendileri “Kâtibzâde” diye âsârı hitâmına kaydederler idi. Hüsn-i hatt-ı sülüs ü neshte Zühdî İsmâ’îl Ağa merhûmdan temeşşuk ile “inâyet-i hat” (1140) târihinde üstâdlarından me’zûn olanların evvelidir. Sâbıku’z-zikr İbrâhîm-i Hanîf Efendi’den mecâlis-i müte’addidede tuğra dahi ta’allüm eylemişti. Aksarây kurbünde Kaftânî Hâcî Bayram Ağa Mescidi ittisâlinde vâki’ sa’âdethânelerinde ta’lîm-i talebe hidmetine ikdâm ile iştihâr-ı tâm bulup hezâr şâkirdân-ı kirâm sâye-i gülzâr-ı himmetlerinde üstâd-ı be-nâm olmuştur.

Her tarafı ma’mûr ve bi’l-hâssa Tarîka-i Sıddîkiyye’de dahi birâderleri Mehmed-i Sa’îd Efendi ile ma’an ahz-ı nisbet eylemiş bir vücûd-ı bihbûd-ı mestûr idi. “Âteş-i hikmet” (1169) târihinde vâki’ harîk-i kebîrde sa’âdethâneleri sûzân olup Kayalar’da vâki’ sâhilhânelerinde sâkin iken “Ser-i kalem bişiken mühr-ken dehân-ı devât” me’âli hasb ü hâli olup müderrisîn-i kirâmdan iken Recebü’l-ferd’in yirmi birinci düşenbe günü rıhlet ve Kayalar Mezâristânı’nda pederleri civârında kalem-i cesedleri kubûr-ı mevtâya vaz’ ve târîh-i rıhleti bu fıkra ile tuhfemize kaydolundu:

Server-ı ehl-i zîb-i hat göçdi (1173)
Silsile-i üstâdları nâmdaş-ı câmi’ü’l-Kur’ân, üstâd-ı âlemiyân, menba’-ı feyzü’l-esrâr-ı hüsn-peyvendî Hâfız Osmân Efendi merhuma peyveste olmadığı cihetten munsıfâne hareket-i üstâdâne ile merhûm-ı merkûmun vâdîsine evâhir-i vaktlerinde taklîdleri sebebiyle beyne’l-urefâ vücûhla haklarında teveccüh-i kulûb rû-nümâ olmuştu. Zarîf-i nüktedân, halûk-ı ehl-i irfân, mücerred-i pâk, nazîri nâyâb bir vücûd-ı âlî-cenâb idi.
Târîh-i seng-i mezarını şâkirdlerinden Mehmed Kerestecizâde yazmıştır.